પેટના દુઃખાવા માટે શ્રેષ્ઠ આયુર્વેદિક ઘરગથ્થું ઉપાયો

અજમો ફાકી લઈને ઉપરથી ગરમ પાણી પીવાથી અજીર્ણ, વાયુ અને પેટનો દુઃખાવો મટે છે.

અજમો અને મીઠું સાથે વાટી તેને ફાકવાથી પેટનો દુઃખાવો દૂર થાય છે.

શેકેલાં જાયફળનું 1 ગ્રામ ચુર્ણ ગરમ પાણી સાથે પીવાથી રાહત મળે છે.

જો જમ્યા પછી સતત દુઃખાવો થાય તો સુંઠ, તલ અને ગોળ સરખા ભાગે લઈ દૂધમાં ઉકાળી સવાર-સાંજ પીવું.

લીંબુના રસમાં પાપડખાર ઉમેરી પીવાથી પેટનો દુઃખાવો અને આફરો મટે છે.

ગોળ અને ચુનો ભેગો કરીને ગરમ પાણી સાથે પીવાથી પેટના દુઃખાવામાં ફાયદો થાય છે.

અજમો અને સંચળનું ચુર્ણ ફાકી લેવાથી વાયુ મટે છે.

કોકમનો ઉકાળો બનાવી તેમાં થોડું મીઠું ઉમેરી પીવાથી વાયુ અને ગોળો મટે છે.

સાકર અને ધાણાનું ચુર્ણ પાણીમાં ઉમેરી પીવાથી પેટની બળતરા મટે છે.

જીરુ અને ધાણા સરખા ભાગે લઈ રાત્રે પલાળી સવારના મસળી, તેમાં સાકર ઉમેરી પીવાથી બળતરા ઓછા થાય છે.

ફુદીનાનો રસ અને સાકરની ચાશણી સાથે લેવાથી આંતરડાની પીડામાં રાહત મળે છે.

ઉકળતા પાણીમાં સુંઠના ચુર્ણ ઉમેરી, ઠંડું થયા પછી ગાળી પાંચ ચમચી જેટલું પીવાથી આફરો અને દુઃખાવો મટે છે.

તલનું તેલ અને હળદર ભેળવી પીવાથી પેટની ચુક મટે છે.

રાઈનું ચુર્ણ અને સાકર ભેળવી પીવાથી વાયુ અને કફથી થતા દુઃખાવામાં રાહત મળે છે.

હિંગ, સુંઠ, મરી, લીંડીપીપર, સિંધવ મીઠું, અજમો, જીરૂ અને શાહજીરૂ સરખા ભાગે લઈ ચુર્ણ બનાવી ‘હિંગાષ્ટક ચૂર્ણ’ બનાવવાથી વિવિધ પ્રકારના દુઃખાવામાં ઉપયોગી રહે છે.

દૂધમાં સાકર ઉમેરી તેમાં 1–2 ચમચી દીવેલ નાંખીને દિવસમાં બે વાર પીવાથી અનેક પ્રકારના પાચન સંબંધિત દુઃખાવામાં રાહત મળે છે.

રાઈનું ચુર્ણ પાણી સાથે લેવાથી અજીર્ણ અને પેટની ચુક મટે છે.